Zili

     "Zili" – xovsuz xalça növünün ən maraqlı nümunələrindən biridir. “Zili” xalçaları üçün heyvan və bitki elementlərinin üslublaşdırılmış forması xarakterikdir. Azərbaycanda “zili” xalçaları kompozisiya və naxışlarına görə çox müxtəlifdir. Bu xalçalara rəsmin plastiki çevikliyi və emosional ifadə səciyyəvidir. Texniki və bədii xüsusiyyətlərinə gəldikdə isə, "zili" xalçalar quşların təsiredici üslublaşdırılmış təsvirləri, "buta" və digər elementlər ilə zəngindir. "Zili"də sahənin mümkün rəsmlərlə doldurulması tendensiyası xasdır. Rəsmlərdən hər biri yerləşmə sxeminə uyğun şəkildə təkrarlanaraq, varlı və nağılabənzər floraya malik bağçanı xatırladır.

Kilim

    "Kilim" – xovsuz xalçaların ən geniş yayılmış növüdür. Kilimlər iplərlə naxışlama yolu ilə daha mürəkkəb hörmə tikməklə toxunur. Kilim həndəsi naxışların əhatə etdiyi çatvari işıq zolağı ilə səciyyələnir. Bu çatvari işıq zolağı şəbəkə effekti verir. Kilimlərin toxuma texnikasında naxışlar əsasən romb, üçbucaq və trapesiya formasında olur. Ənənəvi naxış iri və xırda romb və qarmaq tipli elementlər şəklindədir, bu isə daha qabarıq və ifadəli görüntü yaradır.

Sumax

   "Sumax" xalçaları son bir neçə əsrdə geniş yayılmış və xovsuz xalça növlərindən biri kimi tanınmışdır. "Sumax" xalçalarının texniki xüsusiyyəti onların zəngin kompozisiya və rəngə malik olmasındadır. Müxtəlif tərzdə verilmiş bitki motivləri, iri altıüzlü, kvadrat, romb formalı medalyonlar kimi həndəsi elementlər "Sumax" xalçalarına bayram əhval-ruhiyyəsini bəxş edir. Ənənəvi naxış "dolan-qaç" adlanan dalğavari rəsmli çox kiçik haşiyə ilə tamamlanır.

Palaz

   "Palaz" xovsuz xalçaların ən geniş yayılmış növlərindən biridir. Palazın toxunma prosesi naxışın sadə üsulla əsas hissədən keçirilməsindən ibarətdir. Xalçaçılar palazı Azərbaycan ərazisində çox məşhur olan üfüqi zolaqlardan ibarət ənənəvi naxışlarlarla bəzəyirlər.